Færslur: 2010 Mars

26.03.2010 22:12

Aðalfundur NF Kópavogi 2010

Stjórn Norræna félagsins í Kópavogi boðar til aðalfundar fimmtudaginn 29. apríl 2010 kl 18:00.

Fundurinn verður haldinn í Kórnum fundarsal á jarðhæð í Bókasafni Kópavogs við Hamraborg.

Á dagskrá fundarins eru venjuleg aðalfundarstörf samkvæmt lögum félagsins.

1. Formaður setur fund, kosning fundarstjóra og fundarritara.
2. Lögð fram skýrsla stjórnar.
3. Lagðir fram endurskoðaðir reikningar.
4. Umræður um skýrslu stjórnar og reikninga.
5. Samþykkt skýrslu stjórnar og reikninga.
6. Lagabreytingar.
7. Kosning stjórnarmanna og skoðunarmanna reikninga.
8. Önnur mál.

Félagar eru hvattir til að mæta til aðalfundarins.

23.03.2010 22:14

Vinnufundur stjórnar

Stjórn NF Kópavogi heldur vinnufund nk. laugardag 27. mars kl 10 - 12:30.

Á fundinum verður unnið við félagatal deildarinnar með það að markmiði að skrá netföng félagsmanna. Skráningin er liður í því að miðla upplýsingum frá stjórn og aðalstjórn til félaga með netpósti og auka möguleika  þeirra á að fylgjast betur með því sem stjórnin vinnur að hverju sinni.

Félagar sem óska þess að fá sendar upplýsingar í tölvupósti geta skráð sig inn á gestabók þessarar síðu og komið upplýsingum þess efni á framfæri við stjórn eða sent stjórnarmönnum tölvupóst samanber upplýsingar hér á síðunni.

23.03.2010 22:00

Aðalfundargerð NF 2009

Aðalfundur  NF- Kópavogi 29.04.2009, haldinn kl 18:00, í Bókasafni Kópavogs við Hamraborg.

Formaður setti fundinn og gerði grein fyrir fundarboði á heimasíðu NF-Kóp.  Á síðasta aðalfundi var tilkynnt að allar gjörðir NF-Kóp yrðu hér með tilkynntar á heimasíðu.

Fundarstjóri var kjörinn Birna Bjarnadóttir formaður og  fundarritari Gréta B. Eiríksdóttir. 

Skýrsla stjórnar lögð fram og samþykkt án athugasemda.

Gjaldkeri lagði fram reikninga áritaða af skoðunarmönnum.  Samþykktir án athugasemda.

Margrét  Björnsdóttir lagði fram kveðjur frá Sigurbjörgu Björgvinsdóttur sem var fjarverandi. Formaður lagði til að lagabreytingar verði teknar inn í dagskrá undir önnur mál.  Ekki er gert ráð fyrir lagabreytingum sem sérdagskrárlið í núverandi lögum.

Þeir stjórnarmenn sem hafa lokið kjörtímabili sínu Hrafnhildur Jósefsdóttir og Margrét Björnsdóttir. Þær gefa kost á sér áfram til stjórnar.  Engar aðrar tillögur komu fram  og eru því réttkjörnir.

Aðrir stjórnarmenn kjörnir á síðasta aðalfundi til 2ja ára eru Birna Bjarnadóttir, formaður, Gréta B Eiríksdóttir og Paul Jóhannsson. Tillaga um varamenn til eins þau Hjört Pálsson og Sigurbjörg Björgvinsdóttur vara samþykkt samhljóða en aðra tillögur komu ekki fram.

Skoðunarmenn reikninga þau Hallveig Andrésdóttir og Tómas H. Sveinsson hafa samþykkt að vera áfram í kjöri. Aðrar tilnefningar komu ekki fram og var kjör þeirra  samþykkt.

Kosningu þátttakenda á sambandsþing NF á Íslandi sem haldið verður að hausti var vísað til stjórnar.

Önnur mál:

Lagabreytingar.  Stjórnin samþykkir framkomnar lagabreytingar fyrir sitt leyti og leggur til að samþykktinni verði vísað til sambandsstjórnar.  - Samþykkt einróma.

Formaður lagði fram upplýsingar vegna  Norrænnar messu í Saurbæ á Hvalfjarðarströnd, í Hallgrímskirkju.  Formaður þakkar séra Hirti Pálssyni sérstaklega fyrir hans undirbúning málsins.  Upplýsingar hafa verið sendar til norrænu félaganna á höfuðborgarsvæðinu, deilda, sendiráða og frambjóðenda stjórnmálaflokkanna.

Rætt var um komandi hlutverk Íslands í Norrænu ráðherranefndinni og aukið vægi NF vegna  þessa.

Sambandsþing Norræna félagsins verður haldið í Kópavogi 5. og 6. september í Kópavogi.  Fundur Norrænu félaganna verður svo í Finnlandi helgina á eftir.

Birna Bjarnadóttir formaður stjórnar NF í Kópavogi þakkar stjórninni fyrir samstarf á síðasta starfsári og lýsir ánægju sinni með samstarfið.

Fleira ekki gert og fundi slitið kl 19:37

21.03.2010 13:07

Stjórn NF Kópavogi 2009-2010

Stjórn Norræna félagsins í Kópavogi 2009 - 2010 er skipuð eftirfarandi félögum:

Birna Bjarnadóttir, formaður,
Kópavogstúni 8, 501, 200 Kópavogur 
netfang: birna.bjarnadottir (hjá) simnet.is

Hrafnhildur Jósefsdóttir, varaformaður,
netfang: vigholastigur18 (hjá) internet.is

Margrét Björnsdóttir, ritari
netfang: margretb (hjá) centrum.is

Gréta B. Eiríksdóttir, gjaldkeri
netfang: gretab (hjá) simnet.is

Paul Jóhannsson, meðstjórnandi
netfang: pauljoh (hjá) simnet.is 

Varamenn eru Hjörtur Pálsson netfang: hjorturp (hjá) gmail.com og

Sigurbjörg Björgvinsdóttir netfang: sigurbjorgb (hjá) simnet.is

21.03.2010 12:22

Norrænt vinabæjarmót í Þrándheimi í maí 2010

Stjórn Norræna félagsins í Kópavogi hefur borist boð frá Þrándheimi um þátttöku á Norrænu vinabæjarmóti sem haldið verður 7. og 8. maí nk.
Stjórnum Norrænu félaganna í vinabæjunum er boðin þátttaka til að efla samstarf félagsdeilda Norrænu félaganna.
Komið hefur fram að bæjarstjórn Kópavogs hefur samþykkt að senda 2 fulltrúa til þátttöku á mótinu en ekki hefur verið ákveðið hvort fulltrúi úr stjórn Norræna félagsins sækir mótið.

21.03.2010 12:18

Dagur Norðurlandanna

Norræna félaginu í Kópavogi hefur borist eftirfarandi boð:

Þann 23. mars n.k. mun Norræna félagið á Íslandi standa fyrir
hátíðardagskrá í Norræna húsinu í tilefni af degi Norðurlanda. Við þetta
tækifæri ætlar Norræna félagið að afhenda í fyrsta sinn  heiðursverðlaun
félagsins, Peruna, þeim einstaklingi sem hefur af mikilli hugsjón og
óeigingirni unnið að því að styrkja tengsl norrænna þjóða.

Dagskrá kvöldsins verður að öðru leyti hefðbundin hátíðardagskrá með mat,
ávörpum, söng og gleði. Elín Gunnlaugsdóttir söngkona flytur nokkur lög.

Dill restaurant sér um veitingar, en staðurinn hefur verið tilnefndur sem
besti veitingastaður á Norðurlöndum. Boðið verður upp á tveggja rétta
máltíð með borðvíni og kaffi á eftir. Norrænu sendiráðin styrkja hátíðina
og því er hægt að stilla þátttökugjaldi í hóf.

Hátíðin hefst kl 19 og er þátttökugjald á mann 4.400 kr. Nauðsynlegt er að
skrá þátttöku eigi síðar en 19. mars á netfangið norden@norden.is
eða í síma 551 0165.

Stjórn Norræna félagsins í Kópavogi hvetur félaga að taka þátt þann 23. mars nk.
Hittumst heil.

21.03.2010 11:59

Stjórnarfundur 18. mars 2010

Stjórn Norræna félagsins í Kópavogi kom saman til stjórnarfundar. Fundurinn var haldinn í nýrri aðstöðu Siglingafélagsins Ýmis að Naustavör 20 í Kópavogi kl. 18.00.

Málefni fundarins:

  1. Fundargerðir síðastu funda upp lesinar og samþykktar.

Fundargerð frá 15. september 2009

Fundargerð frá 17. nóvember 2009 og

Fundargerð frá 4. febrúar 2010

Fundurinn sem vera átti í janúar féll niður.

  1. Formannafundur hjá NF - Ísland

"Dagur Norðurlandanna" 23. mars 2010 kl. 19.00

Formaður sagði frá formannafundi NF - Ísland sem haldinn var þann 10. mars kl. 17.00. Þvi miður komust ekki fulltrúar frá Akranesi, Þorlákshöfn og Keflavík en aðrir fulltrúar mættu. Aðalmál fundarins var;

Norræna félagið á Íslandi mun standa fyrir hátíðardagskrá í Norræna húsinu í tilefni af degi Norðurlanda með tilstuðlan og styrk frá norrænu sendiráðunum. Við þetta tækifæri ætlar NF - Ísland að afhenda heiðursverðlaun félagsins, Peruna í fyrsta sinn. Heiðursverðlaunin verða veitt þeim einstaklingi sem hefur af mikilli hugsjón og óeigingirni unnið að því að styrkja tengsl norrænna þjóða.

Dagskrá kvöldsins verður hefðbundin hátíðardagskrá með mat, ávörpum, söng og gleði. Elín Gunnlaugsdóttir, söngkona flytur nokkur lög.

Dill restaurant sér um veitingar en staðurinn hefur verið tilnefndur sem besti veitingastaður á Norðurlöndum. Boðið verður upp á tveggja rétta máltíð með borðvíni og kaffi á eftir. Norrænu sendiráðin styrkja hátíðina og því er hægt að stilla þátttökugjaldi í hóf.

            Hugmyndin er að hafa opið fyrir alla að koma á hátíðina.

Hátíðin hefst kl. 19.00 og er þátttökugjald á mann 4.400 kr. Nauðsynlegt er að skrá þátttöku eigi síðar en 19. mars á netfangið www.norden@norden.is

  1. Vinabæjarmót í Þrándheimi 7. og 8. maí 2010

Norræna félaginu í Kópavogi hefur borist boð á vinabæjarmót frá vinabæ okkar i Þrándheimi.

Vinabæjarmót eða stjórnartengslafundur norrænu vinabæjarfélaganna verður settur föstudagurinn 7. maí nk. kl. 9.00 í ráðhúsinu í Þrándheimi.

Þema fundarins er þrenns konar:

1.  Hvernig eigum við að að koma á góðu samstarfi á milli vinabæjanna

2.  Hlutverk norrænu félaganna i vinabæjarsamstarfinu.

3.  Tillögur á þessum vettvangi er skóli, ungmenni og umhverfi vinabæjanna.

Norræna félagið í Kópavogi sér ekki fært um að styrkja fulltrúa í þessa ferð en

ef einhver úr stjórninni hefur áhuga á að fara verður send umsókn til Kópavogsbæjar um styrk. Hugsanlegir fulltrúar eru Hrafnhildi Jósefsdóttir ef hún kemst ekki þá Hjörtur Pálsson. Aðrir stjórnarmenn hafa gefið þetta frá sér.

  1. Aðalfundur

Vegna aðalfundarins, sem verður 29. apríl nk., verður stjórnin að hittast í eitt skipti til viðbótar til undirbúnings fundarins. Dagsetning ákveðin síðar.

  1. Netfangasöfnun og fjölgun félaga

Hvernig á að efla norrænu félögin á landinu? Talað var um netfangalistann og söfnun netfanga félagsmanna. Birna fékk nýjustu félagsskrána frá höfuðstöðvunum. Þegar þessi stjórn tók við þá voru 410 manns á félagsskránni en það voru þeir sem höfðu borgað félagsgjöldin og einnig þeir sem höfðu ekki borgað gjöldin. Í dag eru félagar á félagaskrá 153 eða aðeins þeir sem hafa borgað félagsgjöldin.

Vinnan við félagsskrána verður þannig háttuð að við byrjum á að afla símanúmera. Tillaga um að stjórnin hittist á Óðinstorgi í tvo tíma til að hringja í félagana í Kópavogi til þess að fá listann sem réttastan. Einnig að reyna að fjölga félögum félagsins.

Birna deildi listanum upp á stjórnina til þess að hver og einn gæti fundið símanúmer á ja.is.

Ákveðið að stjórnin hittist laugardaginn 27. mars í höfuðstöðvum NF - Ísland á Óðinstorgi kl. 10.00-12.00 til þess að hringja í fólk á félagaskránni vegna söfnunar netfanga.

  1. Sænskar hefðir og hátíðir (Det skal vii fira, Svenska traditioner och högtider).

Hirti Pálssyni falið að skoða þessa bók með það það í huga hvort fýsilegt er að gefa út sambærilega bók um íslenska siði.

Fleira ekki gert og ritari ritaði fundargerð.

21.03.2010 11:55

Stjórnarfundur 4. febr. 2010

Stjórn Norræna félagsins í Kópavogi kom saman til stjórnarfundar. Fundurinn var haldinn í nýrri aðstöðu Siglingafélagsins Ýmis að Naustavör 20 í Kópavogi kl. 18.00.

Málefni fundarins:

  1. Fundargerð síðasta fundar upp lesin og samþykkt.
  2. Norræna félagið í Hafnarfirði og aðventusamverustundin í desember sl. Rætt var um ágæti þessarra samkoma og þá sérstaklega vegna þess að fulltrúar fá kærkomið tækifæri til að kynnist hvert öðru og áherslum annarra norrænna félaga. Félögum okkar í Hafnarfiðrið færðar þakkir fyrir.
  3. Formannafundur Formaður sagði frá því að formaður NF - Ísland hafi boðað til formannafundar þann 10. febrúar eða næstkomandi miðvikudag.
  4. Félagaskrá Norræna félagsins í Kópavogi. Rætt var um félagaskrá og netfangalista félagsins. Birna formaður mun sjá um að fá afrit af  félagaskránni á höfuðstöðvunum við Óðinstorg. Stjórnin mun síðan skipta listanum niður á sig til þess að hringja og fá uppgefin netföng og nýjar upplýsingar. Gallinn við listann er að það vantar flestöll netföng. Síðan þarf að fara yfir gamla listann. Ýmislegt sem hægt er að lagfæra til þess að færa okkur inn í tölvuöldina.
  5. Lög félagsins  Ennþá eru lög félagsins í endurskoðun og var Paul og Margréti falið að halda áfram með þá vinnu. Samkvæmt lögum NF - Ísland verða ný eða endurskoðuð lög norrænu félaganna að fara fyrir fund aðalstjórnar NF - Ísland til samþykktar áður en hægt er að samþykkja þau á aðalfundi félags.
  6. Aðalfundur Ákveðið var að halda aðalfund Norræna félagsins í Kópavogi þann 29. apríl 2010 í sal Bókasafns Kópavogs kl. 18.00.

Engin önnur mál lágu fyrir fundi en ritari gékk frá fundargerð.

21.03.2010 11:49

Stjórnarfundur 17. nóv. 2009

Stjórn Norræna félagsins í Kópavogi kom saman til stjórnarfundar. Fundurinn var haldinn á Muffins í Hamraborg þriðjudaginn 17. nóvember 2009 kl. 17.00.

Málefni fundarins:

  1. Norræna félagið í Hafnarfirði býður til aðventusamverustundar.  Eins og fyrri ár hafa norrænu félögin á höfuðborgarsvæðinu komið saman í desember og átt ánægjulega kvöldstund saman með mat og drykk og skemmtilegum uppákomum. Í ár verður Norræna félagið í Hafnarfirði gestgjafi og býður okkur suður að Straumi föstudaginn 20. nóvember kl. 19.30. Stjórn Norræna félagsins í Kópavogi ákvað að mæta öll til veislunnar með mökum sínum og sameinast í bíla.
  2. Bókasafnsvikan í Kópavogi.  Rætt var um bókina "Hvað eru MYTUR" sem gefin var út af NF - Ísland með styrk frá Norðurlandaráði í kjölfar 85 ára afmælis Norræna félagsins NF - Ísland en þá var höfuðborgarráðstefna haldin í Reykjavík. Ráðstefnan var haldin um MYTUR og er þessi bók samantekt á öllum fyrirlestrunum sem haldnir voru á ráðstefnunni.
  3. Næstu þrír fundir ákveðnir.  Fimmtudagur 21. janúar 2010 kl. 18.00-19.00  Fimmtudagur 18. febrúar 2010 kl. 18.00-19.00  Fimmtudagur 18. mars 2010 kl. 18.00-19.00.
  4. Skoðunarmenn reikninga félagsins. Aðalskoðunarmaður félagsins, Tómas H. Sveinsson er fluttur frá landinu og ákvað stjórnin að leita til Kristjáns Guðmundssonar, fyrrverandi formanns Norræna félagsins í Kópavogi til að gegna því starfi frá og með næsta aðalfundi. Ákveðið að senda Tómasi jólakveðju frá stjórninni og sér Hjörtur Pálsson um það.
  5. Lög félagsins Lög félagsins eru í endurskoðun og var Paul og Margréti falið að halda áfram með þá vinnu.

Fleira ekki gert en ritari ritaði fundargerð.

20.03.2010 12:15

Stjórnarfundur 6. okt.2009

Stjórnarfundur Norræna Félagsins í Kópavogi haldinn 6. október á Muffins Bakery í Hamraborg.

Eftirfarandi var rætt:

1.         Rætt um fyrirhugað sambandsþing NF- Ísland sem haldið verður í Kópavogi.

            Formaður var búin að ræða við aðila til að vinna á þinginu (fundarstjóra og ritara).

2.         Fundargerð síðasta fundar leiðrétt.

3.         Rætt um að enn á eftir að bera nýju lögin (nf-Kóp) undir landsfélgið. Enn á eftir að vélrita lögin alminnilega upp og ganga frá þeim. Ákveðið að gera það og senda öllum til yfirlestrar áður en sent frá okkur.


4.         Rætt um dagskrá vetrarins og félagatalið. Rætt um hvort við eigum að hringja út til allra á listanum og vinna upp nýtt félagatal.

           

Rætt um þá hugmynd að hrinda aftur af stað þeirri hefð að halda formannafundi fyrir formenn félaganna á Stór-Reykjavíkur svæðinu.

Fleira ekki samþykkt en varaformaður tók saman fundargerð.

20.03.2010 08:00

Stjórnarfundur 29. sept. 2009

Stjórn Norræna félagsins í Kópavogi kom saman til fyrsta stjórnarfundar eftir aðalfund sem var 29. apríl 2009. Stjórnarfundurinn var haldinn á Muffins í Hamraborg, þriðjudaginn 15. september kl. 17.00.

Fyrsta mál á dagskrá var að stjórnin skipti með sér verkum samkvæmt lögum félagsins.

Formaður Birna Bjarnadóttir lagði fram eftirfarandi tillögu að breyttum hlutverkum í stjórninni frá fyrri stjórn:

            Gjaldkeri:  Gréta Eiríksdóttir

            Ritari:  Margrét Björnsdóttir

            Varaformaður:  Hrafnhildur Jósefsdóttir

            Meðstjórnandi: Paul Jóhannsson

            Varamenn eru sem fyrr:

            Sigurbjörg Björgvinsdóttir og Hjörtur Pálsson

Tillagan var samþykkt.

Því næst var rætt var um væntanlegt starf í vetur.

Hugmynd um að ritari muni að einhverju leyti sjá um heimasíðuna en formaður hefur haft veg og vanda að henni hingað til.

Samþykkt að Paul taki að sér að minna á stjórnarfundi og eftirfylgni samþykkta.
Fleira ekki gert en ritari ritaði fundargerð.

19.03.2010 15:29

Skýrsla stjórnar til aðalfundar 2009

Skýrsla stjórnar NF Kópavogs til aðalfundar 29. apríl 2009

Aðalfundur NF Kópavogi árið 2005 var haldinn 20. október. Þá var kjörin eftirfarandi stjórn:     Kjartan Sigurjónsson, formaður

                                   Birna Bjarnadóttir, varaformaður

                                   Hrafnhildur Jósefsdóttir, gjaldkeri

                                   Margrét B. Eiríksdóttir, ritari

                                   Hrafn Harðarson og

                                   Margrét Björnsdóttir.

Stjórnin hélt nokkra nokkra stjórnarfundi fram til aðalfundar 2006 sem haldinn var 28. mars.

Þá var kosin eftirfarandi stjórn fyrir starfsárið 2006 - 2007:

                                   Birna Bjarnadóttir, formaður

                                   Margrét Björnsdóttir, varaformaður

                                   Hrafnhildur Jósefsdóttir, gjaldkeri

                                   Margrét B Eiríksdóttir, gjaldkeri og

                                   Paul Jóhannsson.

Stjórnin kom saman til 6 stjórnarfunda á því starfsári og var aðalfundur haldinn 25. apríl 2007.

Eftirfarandi skipa stjórn NF í Kópavogi starfsárið 2007 - 2008:

                                   Birna Bjarnadóttir, formaður

Meðstjórnandi:          Margrét Björnsdóttir, varaformaður               

                                    Hrafnhildur Jósefsdóttir          , gjaldkeri       

                                    Margrét B. Eiríksdóttir, ritari   og       

                                    Paul Jóhannsson                                

Varamenn:                 Hjörtur Pálsson           og                   

                                    Sigurbjörg Björgvinsdóttir      

Skoðunarmenn:         Hallveig Andrésdóttir  og       

                                   Tómas H. Sveinsson                          

Fulltrúar á Sambandsþing NF 2007:

                                   Birna Bjarnadóttir og Hrafnhildur Jósefsdóttir

Stjórnin hélt 5 stjórnarfundi og aðalfund 30. apríl 2008.

Starfsárið 2008-2009 var stjórn skipuð þannig:

                                   Birna Bjarnadóttir, formaður

Meðstjórnendur:       Margrét Björnsdóttir, varaformaður

                                   Hrafnhildur Jósefsdóttir, gjaldkeri       

                                   Margrét B. Eiríksdóttir, ritari   og       

                                   Paul Jóhannsson                                

Varamenn:                Hjörtur Pálsson           og                   

                                   Sigurbjörg Björgvinsdóttir      

Skoðunarmenn:        Hallveig Andrésdóttir  og

                                   Tómas H. Sveinsson  

                       

Aðalfundur NF 2008

Aðalfundur NF í Kópavogi var haldinn miðvikudaginn  30. apríl 2008 í fundarsal Bókasafns Kópavogs, Kórnum að Hamraborg 8.

Stjórnin hélt 5 formlega fundi á starfsárinu, en stóð auk þess fyrir einni félagssamkomu, kom saman á óformlegum fundum og tóku þátt í jólagleði hjá Norræna félaginu í Reykjanesbæ, 3 stjórnarmenn sátu formannafund NF 15. nóvember 2008 og samkomu í Norræna húsinu 23. mars 2009 í tilefni Dags norrænnar tungu. Þá skipulagði stjórn Norræna messu sem haldin verður 3. maí 2009 í Hallgrímskirkju í Saurbæ á Hvalfjarðarströnd.

Stjórnarfundur 17. maí 2008.

Stjórn Norræna félagsins í Kópavogi kom saman til fyrsta fundar starfsársins laugardaginn 17. maí. Stjórnin skipti með sér verkum, það er óbreytt skipan frá síðasta starfsári. Varaformaður er Margrét Björnsdóttir, gjaldkeri er Hrafnhildur Jósefsdóttir og ritari Gréta B. Eiríksdóttir.
Rætt var um fundaáætlun stjórnar á árinu og samþykkt að efna til samverustundar í Norræna vinabæjarlundinum við Digraneskirkju, sunnudaginn 22. júní kl 16:00. Rætt var um hugmynd að uppsetningu skiltis með upplýsingum um fjarlægðir til vinabæja Kópavogs. Samþykkt að ritari stjórnar sendi erindi þessa efnis til bæjaryfirvalda en upplýsingar liggja þegar fyrir frá Paul Jóhannssyni.
Rætt um hugmyndir sem fram komu á aðalfundi varðandi notkun netpósts við fundarboðun til félagsmanna og uppfærslu félagaskrár en aðalskrifstofa Norræna félagsins á Íslandi annast félagaskrá, skráningu nýrra og beiðnir um úrsagnir. Félagsmenn hafa nú fengið upplýsingar um heimasíðu Norræna félagsins í Kópavogi og samþykkti stjórnin að leitast við að setja allar upplýsingar um félagsstarfið þar inn, enda er innlit á síðuna nokkuð stöðugt.
Rætt um frekari vinnslu á heimasíðunni sem er í blogsíðuformi en nýtist ágætlega og er hagkvæmur kostur. Stjórnin samþykkti tillögu formanns um að tengjast jafnframt ennfrekar heimasíðu Norræna félagsins á Íslandi.


Stjórnarfundur 22. nóvember 2008.
Gerð var grein fyrir formannafundi Norrænu félaganna sem haldinn var laugardaginn 15. nóvember á skrifstofu Norræna félagsins að Óðinstorgi í Reykjavík. Þann fund sátu Birna Bjarnadóttir, formaður, Gréta B Eiríksdóttir, ritari og Paul Jóhannsson meðstjórnandi. Á þeim fundi var nýr framkvæmdastjóri NF kynntur en það er Ásdís Eva Hannesdóttir og var hún boðin velkomin til starfa.
Á formannafundinum komu fram skýrslur um helstu verkefni félaganna og vakti starf NF á Akureyri nokkra athygli en stjórn félagsins hefur virkjað netið til fundarboðunar félagsmanna. Stjórnin NF í Kópavogi tók ákvörðun um að stofna netfang félagsins og leggja vinnu í að skrá netföng félagsmanna sem það samþykkja.
Rætt var um boð NF í Keflavík og stjórnin samþykkti að stjórn og makar sæktu það jólaboð sem halda á 4. desember en stjórn NF í Kópavogi hélt slíkt boð í desember 2005.
Margrét Björnsdóttir gerði grein fyrir ráðstefnu sem hún sat í Óðinsvéum í september um umhverfismál. Á þeim fundi hitti hún ma formann NF í Óðinsvéum Skúla Fjalldal.
Fram kom að Hjörtur Pálsson, varamaður í stjórn hefur hlotið prestvígslu og hefur tekið við starfi sem slíkur með aðsetur að Hólum í Hjaltadal. Stjórnin óskar honum velfarnaðar á nýjum starfsvettvangi en vonar jafnframt að mega eiga von á honum í heimsókn á fundi og aðrar samkomur félagsins þegar hann á þess kost.
Formaður gerði grein fyrir fundi Vinabæjarnefndar Kópavogs sem haldinn var 20. nóvember sl. Þann fund sat Björn Þorsteinsson sem nú hefur látið af störfum sem sviðstjóri menningarsviðs. Formaður NF flutti Birni kveðjur Norræna félagsins og þakkir fyrir samstarfið á liðnum árum. Linda Udengard mun vera vinabæjarnefndinni innanhandar í störfum sínum.

Stjórnarfundur 17. janúar 2009.
Rætt var um fundargerðir stjórnar og vistun þeirra á heimasíðu en fundargerð síðasta aðalfundar hefur ekki verið lögð fram. Skýrsla stjórnar til aðalfundar 2008 er hins vegar á síðunni. Rætt um tengingu á fleiri tengla á heimasíðunni og uppfærslu á upplýsingum um stjórnarmenn. Kannað verður tengingar inn á félagaskráningarform á heimasíðu Norræna félagsins á Íslandi og upplýsingar um fríðindi félagsmanna.
Rætt var um skráningu netfanga félagsmanna NF í Kópavogi en ekki er enn fundið lausn á hýsingu þeirrar skrár þar sem félagið er ekki með skráðan síma og vistun á simnet.is því ekki valkostur. Samþykkt að formaður ræði við framkvæmdastjóra NF um möguleika á vistun skrárinnar hjá aðalfélaginu.
Þá voru ákveðnir fundardagar stjórnar fram til aðalfundar og verkefni þeirra funda. Samþykkt að taka upp umræðu um endurskoðun laga fyrir Norræna Félagið í Kópavogi en það var langt komið fyrir síðasta aðalfund. Samþykkt að ritari taki saman athugasemdir og sendi stjórnarmönnum í næstu viku. Tillögur að lagabreytingum verði síðan ræddar á fundinum í febrúar. Formanni falið að kanna möguleika á að halda stjórnarfund á skrifstofunni við Óðinstorg í mars. Aðalfundur verði síðan boðaður í apríl.
Sigurbjörg sagði frá ferð félaga í Glóðinni til Kanaríeyja í nóvember og þátttöku á fimleikamóti þar. Mikil starfsemi er á vegum Glóðarinnar og gengur vel að undirbúa þátttöku á landsmóti á Akureyri í sumar og fleiri erlendum mótum á haustmánuðum. Hún sagði að fulltrúar Glóðarinnar hefðu verið 34 en alls 187 frá Íslandi. Þátttakendur voru frá Danmörku og Finnlandi. Sagði hún skemmtilega sögu um finnska hópinn. Aðalfundur Glóðarinnar verður haldinn 22. janúar nk og var varaformanni falið að bera Glóðinni kveðjur frá Norræna félaginu í Kópavogi.
Paul sagði frá þátttöku sinni á vinabæjarmóti í Asker í Noregi með Norræna félaginu í Garðabæ.
Birna gerði grein fyrir fundi vinabæjarnefndar Kópavogs sem haldin var í árslok og boðuðum stjórnarfundi um næstu mánaðarmót.


Stjórnarfundur 7. mars 2009.
Rætt var um endurskoðun laga félagsins sem samþykkt voru á stofnfundi 5. desember 1962 og þykir tímabært að aðlaga þann texta lögum Norræna félagsins á Íslandi og nútímasamfélagi.
Samlesin voru drög að nýjum lagatexta og Paul var síðan falið að senda stjórnarmönnum til yfirlestrar og athugasemda fyrir næsta stjórnarfund sem ákveðinn var 3. apríl.
Formaður gerði grein fyrir fyrirhugaðri dagskrá í tilefni degi norrænnar tungu sem haldinn verður 23. mars. Fjórir stjórnarmenn munu sækja fund af því tilefni fyrir hönd félagsins.
Stjórnin ræddi hugmynd um norræna messu í Hallgrímskirkju á Saurbæ á Hvalfjarðarströnd en Hjörtur Pálsson er þjónandi prestur í þeirri sókn fram á sumar. Nánar verður unnið að þessu verkefni í samráði við Hjört.
Aðalfundur NF í Kópavogi er ákveðinn 29. apríl 2009 kl 18:00. Staðsetning verður kynnt síðar. Rætt var um undirbúning aðalfundar, fundarboðun og kynningu lagabreytinga ef stjórnin ákveður svo.
Stjórnin ræddi um vinabæjarlundinn við Digraneskirkju og fyrirhugaða samverustund á Jónsmessu.


Stjórnarfundur 3. apríl 2009.
Fyrir fundinum lá undirbúningur aðalfundar 2009 sem halda ber samkvæmt lögum í apríl árlega.
Samþykkt var að halda fundinn 29. apríl kl 18:00 og leitast við að fá afnot af fundarsal Bókasafns Kópavogs.
Þá var farið yfir lokadrög að breytingum á lögum félagsins og voru þau samþykkt. Stjórnin mun leggja lagabreytingarnar fyrir aðalfund.
Rætt var um hugmynd að Norrænni messu í Hallgrímskirkju í Saurbæ, boðun hennar og framkvæmd.
Þá var ákveðið að efna til samverustundar í Vinabæjarlundi við Digraneskirkju 21. júní kl 16:00.
Formaður gerði grein fyrir tillögum sem fram komu í hugmyndabankann sem settur var fram á afmæli félagsins og taldi tilvalið að reyna að koma þeim á framfæri á árinu.
Þá var rifjað upp að heimild hafði fengist til að setja upp vegvísi með fjarlægðum frá Kópavogi til vinabæjanna við Vinabæjarlundinn, en þær upplýsingar liggja nú fyrir, ma. á heimasíðu NFKóp.

Vinabæjarlundur við Digraneskirkju

Stjórn Norræna félagsins í Kópavogi boðaði til samverustundar í norræna vinabæjarlundinum í Kópavogi, sunnudaginn 22. júní kl 16:00. Lundurinn er staðsettur vestan megin við Digraneskirkju en aðkoma er ágæt fyrir akandi af bílastæði kirkjunnar og fyrir gangandi af göngustígnum í norðanverðum Kópavogsdal frá Digranesheiði eða Fífuhvammi. Fólk var hvatt til að klæða sig samkvæmt veðri og taka með sér kaffibrúsann.

Árið 1994 var haldið vinabæjarmót í Kópavogi. Þá vígður Vinabæjarlundur vestan við Digraneskirkju og gróðursett eitt tré og tileinkað hverjum vinabæ. Norræna Félagið í Kópavogi hyggst hlú að þessum trjálundi á hverju sumri og efna þar til hátíðarstundar 24. júní. Við gangstíg neðan við þennan lund hafa Rótarý, Lions og Kíwanisklúbbar í Kópavogi sett upp upplýsinga skilti um trjálundi á þessu svæði í Kópavogsdalnum.

Jólafagnaður stjórna Norrænu félaganna á höfuðborgarsvæðinu

Stjórn NF í Keflavík bauð stjórnum Norrænu félaganna á höfuðborgarsvæðinu til jólateitis fimmtudagskvöldið 4. desember sl. Fjölmenni þáði þetta góða boð þar sem á borðum var hangikjöt úr Samkaupum, grænar baunir, rauðkál og kartöflur með uppstúf. Síðan var borin var skyrterta sem þótti einstaklega góð og hefur formaður NF í Keflavík góðfúslega gefið leyfi til að birta uppskriftina með þessari frétt. Meðan á samkomunni stóð kom fram fjöldi ungra hljómlistarmanna sem flutti jólalög og önnur hugljúf lög.
Stjórn NF í Kópavogi þakkar kærlega fyrir ánægjulegt kvöld og hlakkar til að taka þátt að ári í Hafnarfirði.

Vinabæjarsamstarf

Norræna félagið í Tampere bauð fulltrúum norrænu félaganna til þátttöku á fundi 29. - 30. september í tilefni afmælis borgarinnar. NF í Kópavogi sendi Margréti B. Eiríksdóttur, ritara stjórnar, sem fulltrúa sinn til fundarins. Formaður Norræna félagsins í Óðinsvéum hefur ítrekað verið í sambandi við formann NF í Kópavogi og er væntanlegur í heimsókn um miðjan maí.

Kópavogur hóf vinabæjarsamstarf við borgir og bæi á Norðurlöndum árið 1964, en Norræna Félagið í Kópavogi var stofnað 5. desember 1962.

Vinabæir Kópavogs eru:

Álandseyjar:                Mariehamn

Danmörk:                    Odense

Finnland:                     Tampere

Færeyjar:                     Klaksvik

Grænland:                   Ammassalik

Noregur:                      Trondheim

Svíþjóð:                      Norrköping

Kína:                           Wuhan

Vinabæjarnefnd Kópavogs 2006 - 2010

er skipuð eftirfarandi fulltrúum:

Margrét Sigmundsdóttir, formaður

Hildigunnur Lóa Högnadóttir

Heiðrún Sverrisdóttir

Gunnar Birgisson, bæjarstjóri Kópavogs og

Birna Bjarnadóttir, formaður NF í Kópavogi

Með vinabæjarnefndinni starfa Guðrún Pálsdóttir, framkvæmdastjóri tómstunda og menningarsviðs og Linda Udengaard deildarstjóri menningardeildar.

Vinabæjarnefnd Kópavogs hefur komið saman til nokkurra funda.

Kópavogi, 28. apríl 2009

F.h. stjórnar NF Kópavogi

Birna Bjarnadóttir, formaður

  • 1
Flettingar í dag: 21
Gestir í dag: 15
Flettingar í gær: 13
Gestir í gær: 10
Samtals flettingar: 79283
Samtals gestir: 28503
Tölur uppfærðar: 23.8.2019 23:07:06